काठमाडौं । उदयपुर, बेलका नगरपालिका–१ भालबन्दी टोल बस्ने मनोरथ कोईरालाको गोठमा गएराति आगलागी हुँदा काठ, पराल, ग्वाली पूर्णरुपमा जलेर करिब १० लाख रुपैयाँ बराबरको धनमाल नष्ट भएको छ । सल्यान, कपुरकोट गाउँपालिका–५ सल्लेरी बस्ने सोमराज रोकाको घरमा राति आगलागी हुँदा घर, लगायत सरसामान जलेर करिब ८ लाख रुपैयाँ बराबरको धनमाल नष्ट भएको छ । मोरङ, लेटाङ नगरपालिका–२ बस्ने कमल लुईटेलको ग्वालीमा वेल्डिङ्ग गर्ने क्रममा दिउँसो आगलागी हुँदा पराल, काठ, मकै दाना लगायतका सरसामान जलेर करिब ७ लाख १० हजार रुपैयाँ बराबरको धनमाल नष्ट भएको छ । महोत्तरी, एकडारा गाउँपालिका–४ हल्खोरी चोकमा रहेको सुमन महतोको किराना पसलमा विद्युत सर्ट भई गएराति आगलागी हुँदा फ्रिज, टिभि, लगायतका सामानहरु जलेर करिब ५ लाख रुपैयाँ बराबरको धनमाल नष्ट भएको छ । प्रहरीले स्थानीय वासिन्दा तथा दमकलको सहयोगमा आगलागी नियन्त्रणमा लिनुका साथै यस सम्बन्धमा आवश्यक अनुसन्धान गरिरहेको छ ।
