काठमाडौं । भोजपुर, षडानन्द नगरपालिका–१२ तितिरी डाँडा बस्ने ६७ वर्षीय पदम बहादुर घिमिरेको घरमा दिउँसो आगलागी हुँदा घर र विभिन्न सरसामान पूर्ण रुपमा जलेर करिब ७ लाख ६० हजार रुपैयाँ बराबरको धनमाल नष्ट भएको छ । दैलेख, आठबिस नगरपालिका–१ सिगौडी बस्ने ३० वर्षीय लालमनी बिकको घरमा सोलारको तार सर्ट भई दिउँसो आगलागी हुँदा घर पूर्णरूपमा जलेर करिब ५ लाख रुपैयाँ बराबरको धनमाल नष्ट भएको छ । त्यसैगरी काठमाडौं, काठमाडौं महानगरपालिका–२६ गल्को पाखा, सुकुबाहाल डेरा गरी बस्ने बिराटनगर घर भएकी २० वर्षीया लिलिमा तामाङ नाम गरेकी महिला आफ्नै ओछ्यानमा मृत अवस्थामा फेला परेकी छन् । भक्तपुर, सूर्यविनायक नगरपालिका–८ आशापुरीस्थित सामुदायिक जंगलमा हाल नाम, थर, वतन नखुलेका करिब ४५ वर्षीय पुरुष मृत अवस्थामा फेला परेका छन् । बर्दिया, मधुवन नगरपालिका–४ गम्मका बस्ने ५० वर्षीया दहनी थरुनी आफ्नै घरमा मृत अवस्था फेला परेकी छन् । नवलपरासी (पूर्व), विनयी त्रिवेणी गाउँपालिका–१ सिसेनी बस्ने ३१ वर्षीय दिनेश कुमाल आफ्नै घरमा मृत अवस्थामा फेला परेका छन् । ओखलढुंगा, मोलुङ गाउँपालिका–७ तालकोट बस्ने ३० वर्षीय छिरि शेर्पा सोही ठाउँ बस्ने कुसाङ शेर्पाको भान्छा घरमा रहेको काठको खाटमा मृत अवस्थामा फेला परेका छन् ।
