काठमाडौं । आफ्नै श्रीमती २० वर्षीया युनिशा खत्री पौडेलको खुकुरी प्रहार गरी हत्या गरेको अभियोगमा बेलका नगरपालिका–९ भचुवा बस्ने २७ वर्षीय बिनोद पौडेललाई दिउँसो प्रहरीले पक्राउ गरेको छ । सोही नगरपालिका–६ स्थित जाल्पा वाबुङ्ला रमिते सामुदायिक बनमासँगै घास काट्न गएको अवस्थामा खुकुरी प्रहार गरी आफैले श्रीमतीको हत्या गरेको जानकारी गराएपछि ईलाका प्रहरी कार्यालय रामपुरठोक्सिलाबाट खटिएको प्रहरीले उनलाई नियन्त्रणमा लिएको हो । त्यसैगरी १५ वर्षीया किशोरीलाई जबरजस्ती करणी गरेको अभियोगमा कन्काई नगरपालिका–८ बस्ने ३९ वर्षीय अशोक बराइलीलाई साँझ प्रहरीले पक्राउ गरेको छ । अशोकले ती किशोरीलाई गत पुस २९ गतेदेखि पटक–पटक जबरजस्ती करणी गरेको भन्ने उजुरीको आधारमा ईलाका प्रहरी कार्यालय अनारमनीबाट खटिएको प्रहरीले उनलाई पक्राउ गरेको हो । त्यसैगरी धनकुटा, महालक्ष्मी नगरपालिका–५ ज्यामिरे बस्ने ७० वर्षीय मान बहादुर बस्नेत आफ्नै घरको कोठामा मृत अवस्थामा फेला परेका छन् । धारिलो हतियार प्रहार गरी हत्या भएको अवस्थामा बस्नेतको शव फेला परेको भन्ने खबर प्राप्त हुनासाथ जिल्ला प्रहरी कार्यालय धनकुटाबाट खटिएको प्रहरीले घटनाको थप अनुसन्धानको लागि १ जनालाई नियन्त्रणमा लिएको छ । रौतहट, गौर नगरपालिका–२ स्थित सुदर्शन आँखा अस्पताल नजिक भारत घर भएका ६० वर्षीय श्याम बहादुर यादव मृत अवस्थामा फेला परेका छन् ।
