काठमाडौं । उदयपुर, रौतामाई गाउँपालिका–८ पाखाटोल बस्ने राम बहादुर मगरको घरमा विद्युत सर्ट भई दिउँसो आगलागी हुँदा उक्त आगलागीमा परी राम बहादुर मगरकी छोरी ६ वर्षीया जस्मिन मगर र छोरा २ वर्षीय रोजन मगरको घटनास्थलमै मृत्यु भएको छ । आगलागीबाट घर, अन्नपात, लत्ताकपडा, भडावर्तन लगायतका सरसामन जलेर करिब १० लाख रूपैयाँ बराबरको धनमाल नष्ट भएको छ । खोटाङ, दिक्तेल रुपाकोट मझुवागढी नगरपालिका–१२ लमर्खु बस्ने कुमार श्रेष्ठको घरमा बिहान आगलागी हुँदा घर, घरभित्र रहेको नगद २ लाख ९० हजार रूपैयाँ, सुन ४ तोला, चाँदी ९ तोला, लत्ताकपडा, भाँडावर्तन, अन्नपात लगायतका सामान जलेर करिब ५० लाख रूपैयाँ बराबरको धनमाल नष्ट भएको छ । सप्तरी, तिरहुत गाउँपालिका–५ लोहजरा बस्ने राम किसुन मैरता यादवको घरमा विद्युत सर्ट भई दिउँसो आगलागी हुँदा उक्त आगो फैलिएर राम किसुन मैरता यादव समेत ५ जनाको १४ वटा कच्ची घर जलेर करिब ४० लाख ९९ हजार रूपैयाँ बराबरको धनमाल नष्ट भएको छ । पाँचथर, कुम्मायक गाउँपालिका–३ हात्तीपोखरीस्थित जंगलमा दिउँसो लागेको आगो फैलिएर सोही ठाउँ बस्ने रन बहादुर बुढाथोकी समेत ४ जनाको ४ वटा कच्ची घर पूर्णरूपमा जलेर करिब ३५ लाख रूपैयाँ बराबरको धनमाल नष्ट भएको छ ।
