काठमाडौं । कालिका नगरपालिका-१० पाईमराङ बस्ने ५० वर्षीय दिल बहादुर प्रजाको चट्याङ लागेर दिउँसो मृत्यु भएको छ । सोही ठाउँस्थित आफ्नै सम्धिनीको घरमा चट्याङ लागेर उनको घटनास्थलमै मृत्यु भएको हो । साथै चट्याङ लागेर घाइते भएकी सोही ठाउँ बस्ने २४ वर्षीय सरिता चेपाङको भरतपुर सरकारी अस्पतालमा उपचार भइरहेको छ । यसैबीच काभ्रे, नमोबुद्ध नगरपालिका-६ बस्ने रामशरण न्यौपानेको छोरी १३ वर्षीया खुसी न्यौपाने सोही ठाउँस्थित दाप्चा खोलाको दहमा मृत अवस्थामा फेला परेकी छिन् । बर्दिया, बारबर्दिया नगरपालिका-९ कतर्निया बस्ने सिपाही चौधरीकी छोरी ३ वर्षीया प्रिन्सा चौधरी सोही ठाउँस्थित बबई सिँचाइ नहरमा मृत अवस्थामा फेला परेकी छिन् । साँझ बालिका हराएको भन्ने खबर प्राप्त हुनासाथ प्रहरी चौकी कतर्नियाबाट खटिएको प्रहरीले स्थानीयको सहयोगमा खोजी गर्ने क्रममा शव फेला परेको हो । यसैबीच मकवानपुर, हेटौंडा उपमहानगरपालिका-१५ चुरेमाईबाट अवैध लागूऔषध गाँजा २५ किलोग्राम सहित २ जनालाई साँझ प्रहरीले पक्राउ गरेको छ । पक्राउ पर्नेहरूमा राक्सिराङ गाउँपालिका-४ बस्ने २१ वर्षीय सुसिल बल र ३२ वर्षीय हिमाल ब्लोन रहेका छन् । प्रहरी चौकी रातोमाटेबाट खटिएको प्रहरीले हेटौंडाबाट पथलैयातर्फ जाँदै गरेको बा.१४ च ३८५५ नम्बरको बलेरो जिपलाई जाँच गर्ने क्रममा बर्नटमा लुकाई राखेको अवस्थामा उक्त गाँजा फेला पारी बलेरो चालक सुसिल र बलेरोमा सवार हिमाललाई पक्राउ गरेको हो । सुनसरी, धरान उपमहानगरपालिका-१७ ठकुरी पुलबाट अवैध लागूऔषध खैरो हेरोइन जस्तो देखिने पदार्थ १२ ग्राम २ सय ३० मिलिग्राम सहित सोही ठाउँ बस्ने २४ वर्षीय रोशन राईलाई राती प्रहरीले पक्राउ गरेको छ ।
