लागूऔषधसहित नियन्त्रणमा

काठमाडौं । सर्लाही, बागमती नगरपालिका-१२ बागमती पुलस्थित सडकबाट अवैध लागूऔषध गाँजा करिब २० ग्राम र नियन्त्रित लागूऔषध नाइट्राभेट १५ ट्याब्लेट सहित सोही ठाउँ बस्ने २२ वर्षीय प्रेम तामाङ र १९ वर्षीय निशान दोङलाई राति प्रहरीले पक्राउ गरेको छ । इलाका प्रहरी कार्यालय कर्मैयाबाट खटिएको प्रहरीले उनीहरूलाई उक्त लागूऔषध सहित पक्राउ गरेको हो । तुलसीपुर उपमहानगरपालिका-७ पर्सेनीस्थित सडकबाट अवैध लागूऔषध ब्राउनसुगर ७ सय २० मिलिग्राम सहित २ जनालाई बिहान प्रहरीले पक्राउ गरेको छ । पक्राउ पर्नेहरूमा सोही उपमहानगरपालिका-६ बस्ने २३ वर्षीय ऋषिकेश वली र १९ वर्षीय इशान डाँगी रहेका छन् । अस्थायी प्रहरी पोष्ट पर्सेनीबाट खटिएको प्रहरीले घोराहीबाट तुलसीपुरतर्फ आउँदै गरेको रा.६ प ८५०५ नम्बरको मोटरसाइकल जाँच गर्ने क्रममा मोटरसाइकलमा सवार उनीहरूलाई उक्त लागूऔषध सहित पक्राउ गरेको हो ।