तातोपानी नाका स्थानीयका लागि खुल्ला

काठमाडौं । चीनसँगको उत्तरी सीमानाका तातोपानी खुलेको छ । लामो समय आवागमन बन्द रहेको तातोपानी नाका शुक्रबारदेखि खुलेको हो । गत मङ्गलबार तिब्बतको ल्हासामा चिनियाँ अधिकारी र नेपाली अधिकारीबीच भएको बैठकले नाकामा स्थानीय सर्वसाधारण आवतजावत गर्न पाउने निणर्य गरेको प्रमुख जिल्ला अधिकारी रमेश न्यौपानेले जानकारी दिए । विसं २०७२ को भूकम्पयता तातोपानी नाका बन्द हुँदै आएकामा तीन महिनाअघिदेखि मालवाहक सवारीको आवतजावत खुलेको थियो । प्रजिअ न्यौपानेले यसअघि मानिस आवतजावत भने खुल्न नसकेको भन्दै शुक्रबारदेखि स्थानीयको आवागमन खुल्ला गरिएको बताएका छन् । उनका अनुसार सिन्धुपाल्चोकका स्थानीयले आवतजावतका लागि एक वर्ष अवधि रहेको पास पाउनेछन् ।