काठमाडौं । रोल्पा, रोल्पा नगरपालिका-७ बरबोट बस्ने ३५ वर्षीया जुनिता घर्तीको घरबाट नगद १ लाख ४५ हजार रूपैयाँ, सुन तथा चाँदीका विभिन्न गरगहना समेत गरी करिब १७ लाख ९८ हजार रूपैयाँ बराबरको धनमाल दिउँसो चोरी भएको छ । झापा, मेचिनगर नगरपालिका-१० आम्दा टोल बस्ने ३५ वर्षीय विवेक ढकालको घरबाट सुन तथा चाँदीका विभिन्न गरगहना तथा नगद समेत गरी करिब ३ लाख ३ हजार रूपैयाँ बराबरको धनमाल राति चोरी भएको छ । प्रहरीले चोरीमा संलग्न हाल फरार व्यक्तिहरूको खोजी गर्नुका साथै यस सम्बन्धमा आवश्यक अनुसन्धान गरिरहेको छ । यसैबीच मोरङ, केराबारी गाउँपालिका-९ बेलचौरीस्थित सडकमा बेलचौरीबाट भलुवातर्फ जाँदै गरेको को.२ त १६७ नम्बरको ट्याक्टरबाट लडेर ट्याक्टरमा सवार सोही ठाउँ बस्ने यमनाथ परियारको छोरा ६ वर्षीय युनिक परियारको दिउँसो मृत्यु भएको छ । दुर्घटनामा गम्भीर घाइते भएका उनको कोशी अस्पताल बिराटनगरमा उपचारको क्रममा मृत्यु भएको हो । ट्याक्टर चालकलाई प्रहरीले नियन्त्रणमा लिएको छ । बर्दिया, बाँसगढी नगरपालिका-४ मटेरिया चोकस्थित सडकमा भे १ च ४६८ नम्बरको अटो अनियन्त्रित भई दिउँसो दुर्घटना हुँदा अटोमा सवार बाँसगढी नगरपालिका-८ ककौरा बस्ने ५९ वर्षीय दीर्घ नारायण पंगेनीको मृत्यु भएको छ । दुर्घटनामा गम्भीर घाइते भएका उनको मेडिकल कलेज कोहलपुर बाँकेमा थप उपचारको क्रममा मृत्यु भएको हो ।
