काठमाडौं । मोरङ, उर्लाबारी नगरपालिका-३ नयाँ मंगलबारेस्थित सडकमा प्र १-०२-०५० प ८४०६ नम्बरको मोटरसाइकल र प्र १-०२-०४३ प ९२२६ नम्बरको मोटरसाइकल एकआपसमा ठक्कर खाई दिउँसो दुर्घटना हुँदा दुवै मोटरसाइकलमा सवार ३ जनाको मृत्यु भएको छ । दुर्घटनामा गम्भीर घाइते भएका प्र १-०२-०५० प ८४०६ नम्बरको मोटरसाइकल चालक पथरीशनिश्चरे नगरपालिका-५ बस्ने ४२ वर्षीय दिपक धिमालको अरनिको अस्पतालमा, प्र १-०२-०४३ प ९२२६ नम्बरको मोटरसाइकलमा सवार कानेपोखरी गाउँपालिका-४ रमाईलो बस्ने २८ वर्षीय किशोर गुरूङको मदन भण्डारी अस्पताल तथा ट्रमा सेन्टर मंगलबारे र सोही मोटरसाइकलमा सवार कानेपोखरी गाउँपालिका-४ बस्ने २८ वर्षीय अमृत लिम्बुको बिएण्डसि अस्पताल बिर्तामोडमा थप उपचारको क्रममा मृत्यु भएको हो । साथै दुर्घटनामा घाइते भएका १ जनाको बिएण्डसि अस्पतालमा उपचार भइरहेको छ । पाल्पा, रैनादेवी छहरा गाउँपालिका-४ ध्वजाबान्नेस्थित सडकमा लु.१ ज ४२३१ नम्बरको बलेरो गाडीको ठक्करबाट पैदलयात्री सोही गाउँपालिका-१ सिद्धेश्वर बस्ने ४२ वर्षीय खड्क बहादुर पुनको साँझ मृत्यु भएको छ । दुर्घटनामा गम्भीर घाइते भएका उनको लुम्बिनी मेडिकल कलेज प्रभास पाल्पामा उपचारको क्रममा मृत्यु भएको हो । गाडी चालकलाई प्रहरीले नियन्त्रणमा लिएको छ ।
