काठमाडौं । कञ्चनपुर, बेलौरी नगरपालिका–६ रिछामा से.१ त १८३५ नम्बरको ट्याक्टर अनियन्त्रित भई दिउँसो दुर्घटना हुँदा ट्याक्टर चालक सोही नगरपालिका–३ पडाउ बस्ने ४५ वर्षीय शिवचरण चौधरीको मृत्यु भएको छ । दुर्घटनामा गम्भीर घाइते भएका उनको सेती प्रादेशिक अस्पताल धनगढीमा उपचारको क्रममा मृत्यु भएको हो । नवलपरासी पश्चिम, सुनवल नगरपालिका–२ नयाँबस्तीमा प्रदेश ३–०३–००१ प ४९६३ नम्बरको मोटरसाइकल अनियन्त्रित भई राति दुर्घटना हुँदा मोटरसाइकलमा सवार रामग्राम नगरपालिका–१७ देवगाउँ बस्ने ३४ वर्षीय शैलेश यादवको मृत्यु भएको छ । दुर्घटनामा गम्भीर घाइते भएका उनको जिल्ला अस्पताल परासीमा उपचारको क्रममा मृत्यु भएको हो । साथै दुर्घटनामा घाइते भएका मोटरसाइकलमा सवार अन्य १ जनाको सोही अस्पतालमा उपचार भइरहेको छ । मोरङ, सुन्दरहरैचा नगरपालिका–१० किस्ति पुलस्थित सडकमा मे.१ ख २२८३ नम्बरको बसले प्रदेश १ ०२–०४३ प ३२४३ नम्बरको मोटरसाइकललाई दिउँसो ठक्कर दिँदा मोटरसाइकलमा सवार सोही नगरपालिका–६ बस्ने ६५ वर्षीय उमाकान्त कोईरालाको मृत्यु भएको छ । ठक्करबाट गम्भीर घाइते भएका उनको न्यूरो अस्पताल बिराटनगरमा उपचारको क्रममा मृत्यु भएको हो । बस चालकलाई प्रहरीले नियन्त्रणमा लिएको छ ।
